A Commuter Rant

Hindi po ako ngongo, wala pong problema ang computer ko. nagrereklamo lang ako, isang commuter.

Naaalala ko yung classmate ko na laking maynila, pangarap niya ang makasakay ng eroplano dahil ang itinuturing niyang pinakamasarap sakyang pang-commute ay ang bus. Hindi ako nagba-bus ng mga panahong iyon dahil natatakot akong tumayo kapag punuan, idagdag mo na ang pagiging probinsyana ko na nagpapaniwala sa mga sabi-sabi na wala ka daw ligtas sa mga mandurukot at holdaper kapag bus ang sinasakyan mo. Nag-iFx ako pag papasok o di kaya ay jeep, kaya para sa akin kapag nandito ako sa manila, fx ang pinakamaalwang sakyan, maliban na lang kung ang aircon ng nasakyan mo ay parang turbo broiler at pagdating mo sa pupuntahan mo mukha ka nang grilled crispy pata. May mga panahon din na may putok ang katabi mo o kaya'y nagsashower ang ang laway ng bibig ng driver, kapag mga ganitong sitwasyon wala akong magawa kundi ang sumimangot kahit pa may nakadikit na bawal ang nakasimangot dito sa bintana, kasehodang magmukha akong unggoy gaya ng nasa poster, eh sa naiinis ako bakit ba?!

Bukod sa mainit at maalikabok, ayoko din ng jeep pero kapag walang ibang choice mas pipiliin ko sumakay kesa kumapal ang kalyo ko at madaig ang mga nagjojogging sa luneta sa kalalakad-takbo. Kapuna-puna ang mga sakay nito, may saksakan palagi. Saksakan ng pangit, Saksakan ng sungit, Saksakan ng gwapo't ganda, Saksakan ng taba, Saksakan ng itim, at di ka pa rin makakaligtas sa Saksakan ng amoy putok, asahan mong kapag nasa likuran ka ng taong ito pagdating mo sa pupuntahan mo ikaw na ang amoy putok. Pagsigaw mo ng bayad, biglang may tulog, may busy sa pagsilip sa bintana ng jeep, may nagbubuklat ng bag at may deadma, aba'y ang sarap paguuntugin ang kanilang mga ulo! Meron namang akala mo pantatlong tao ang pagkakaupo kulang nlng ipatong niya ang paa sa upuan. Hoy! upong pang-7.50 lang ho!

Ok din namang sakyan ang tricycle lalo na kapag palabas ka ng subdibisyon, alangan namang lakarin mo yung parang burol na structure ng kalsada sa subdivision niyo, yun nga lang tatagain ka sa presyo dahil hindi parepareho ang singil, lumampas ka lang ng isang hakbang dagdag ng piso, ano yun de-metro parang taxi? minsan may nasakyan akong tricycle, nakangiti pa akong nagsabi na "manong, pakidahan dahan mo lang sa baha kasi naka-puti ako maputik sa daan.thank you!" d^_^b at itong pilosopong drayber binagalan ang maneho, parang mas matulin pa ang pagong sa bagal niya magpatakbo hinayaan ko nga, siya naman ang lugi at least hindi naputikan ang pantalon ko.

Mabalik tayo sa bus...

Ngayon wala na akong pagpipilian pang sakyan kundi ang bus dahil wala namang jeep na namamasada sa Edsa. Ganoon din ang scenario sa bus, iba-ibang tao, iba-ibang amoy, may masungit na pasahero at kunduktor, may nagtitinda pa ng mani, tubig at kendi, may natutulog, may nagbabasa, may nagdadaldalan at naghaharutan. Hindi ko naman sila pinakikialaman, napapansin ko laang. Bukod sa kapansin-pansing mga karakter ng mga kapwa ko commuter, kapansin-pansin din ang kabuuang itsura ng bus, may sobrang lamig, may sobrang init, may parang lata ng sardinas na pilit isinisiksik ang mga pasahero at kapag nataon na nakatayo ka batok at kilikili ang nakakaharap mo, ang sagwa di ba? May mga bus din na malinis tingnan, maliwanag, walang kalat pero pagbuhos ng ulan asahan mo kahit sa loob kailangan mong magpayong. Yung iba nga kahit walang ulan may tulo e mantakin mo iyon, ang tindi ng init sa labas tapos ikaw basa ang bunbunan. Meron din akong tinatawag na smokey mountain sa loob ng bus, gabundok talaga ang kalat kung iipunin mo at nanlilimahid sa libag ang mga bintana. Minsang isinabit ko ang kurtinang libagin sa cover ng upuan, naglaglagan ang siguro mga beinte pirasong ticket na nakabalunbon, sinubukan kong silipin ito, presto! hindi lang ticket ang laman nito, may balat ng kendi, chippy, tiket, plastic, papel, at kulangot. nakakadiri, sabi pa ng sosi kong katabi "yuck! haw gros naman dat ting!". Katanggap-tanggap naman siguro ang ganitong sitwasyon kung ang singil sa pamasahe ay makatarungan, pero baliktad yata ang mother earth eh.. mas pangit na bus, mas mahal ang bayad.

Kawawa naman pala ang kaklase ko... sana nga makasakay siya ng eroplano.