Fan-bihira

Naranasan mo na bang makipagpatintero sa mga katulad mo ding adik sa celebrity? Yung tipong kaya mong makipagbakbakan kapag nasingitan ka sa pila ng nagpapa-autograph sa Idol mo? Yung tipong kapag siniraan ang peborit mo ay pakikitaan mo ng pruweba na mali ang iniisip nila at daig mo pa ang stage mother at manager sa pagtatanggol sa idol mo?

Humahanga din ako, local man o foreigner, singer man o artista, bida o kontrabida, director o stuntman basta magaling. Minsan nakakainis din maging tagahanga, o tangahanga. sa libo-libo nilang tagahanga sa palagay mo natatandaan ka pa niya? malamang hindi na, lalo pa kung isa ka lang ordinaryong magtitinapa o kaya ay dispatcher ng jeep, kung sa harap ng camera malamang hahalikan ka pa, may camera eh. Ikaw sino ba ang idolo mo? sikat ba siya? naalala ko tuloy nang minsang napadaan ako sa tiangge sa greenhills, nakasalubong ako ng celeb.. tawagin natin siyang si pearly (karakter niya sa teleserye), in fairness parang siya lang ang tao sa daan, walang lingon sa kanan o kaliwa, parang kabayo diretso ang tingin, oo nga naman celebrity siya eh dun malalaman kung sikat ka kasi kung hindi ka nabangga ibig sabihin nakilala ka at sila mismo ang humawi sa dadaanan mo. Paano pa kaya ang ilang sikat na artista? kulang na lang pagsamba at gawin silang diyos mo.

Hindi mo rin naman masisisi ang mga sikat na taong ito, hindi naman nila kasalanan ang maging talentado. Ang naging kasalanan lang nila lumalaki ang ulo nila, o wag ka na mag-react, alam ko hindi naman lahat. Sino nga ba ang ugat ng paglaki ng ulo ni betty boop? wala lang gusto ko lang itanong.

Siguro mga tangahanga din ang naglalagay ng ipot sa ulo ng mga batikan nating artista at singers. Sila ang nagsisiksik ng ideya na sikat na ang idolo nila at kasabay noon ang pagtatayo ng fans club, sino nga ba ang nagsimulang magtayo ng fans club dito sa Pilipinas? Mga Noranians o Vilmanians? dati ang naglalaban-laban ang mga tagahanga sa magkaibang panig katulad nga ng vilmanians vs noranians pero ngayon bumabaliktad na co-fan vs co-fan na, pasikatan na sa kapwa tangahanga, kung ikaw ang beteranong tagahanga at nakakabeso-beso mo ang iyong idolo, at 24/7 kayong pwedeng magchikahan sa text, ang kasikatan mo sa mga ordinaryong miyembro parang singtaas ng pagtingin nila sa pareho ninyong hinahangaan ang kaibahan lang hindi ka sikat sa telebisyon o sa radyo, pero at least sikat ka sa kapwa mo tangahanga.

Ngayong dumadami na ang bilang nating mga tangahanga, bakit parang hindi ka masaya sir? Gusto mo bang ikaw lang ang humanga? ikaw lang ang pwedeng kumurot sa pisngi ng idolo natin? Gusto mo bang ikaw lang ang pinipirmahan sa noo ng idolo natin? Ikaw lang ang laman ng lahat ng lakad ng fans club?

Anak ni Baby powder... magtayo ka ng soloist fan club.

(draft-unedited, hindi ko pa na proof-read)